Айни пайтда Тошкент давлат транспорт университети базасида Boeing компанияси томонидан авиакомпаниялар фаолиятини режалаштиришга бағишланган семинар бўлиб ўтмоқда. Мазкур тадбир фуқаро авиацияси соҳасида тажриба алмашиш ва долзарб масалаларни муҳокама қилишга қаратилган. доирасида авиакомпанияларни ривожлантириш стратегияси, ҳаво кемалари паркини шакллантириш ва янгилаш, иқтисодий самарадорликни ошириш ҳамда парвозлар хавфсизлигини таъминлаш каби мавзулар кўриб чиқилмоқда.
Тадбирда Ўзбекистон Республикаси Транспорт вазирлиги, “Узавиация” агентлиги, миллий авиаташувчилар ва “Узаэронавигация” Маркази ДУК мутахассислари ҳам фаол иштирок этмоқда. Boeing компанияси томонидан маршрутларни оптималлаштириш, ёқилғи сарфини ва углерод чиқиндиларини камайтириш бўйича ечимлар тақдим этилмоқда. Бу эса ўз ўрнида авиация соҳасини барқарор ривожлантириш мақсадларига тўлиқ мос келади.
Таъкидлаш жоиз, семинар қатнашчиларга Ўзбекистонда авиация соҳасининг бугунги тенденциялари ва истиқболларини чуқур таҳлил қилиш, шунингдек, соҳанинг асосий иштирокчилари ўртасида ҳамкорликни мустаҳкамлаш имконини беради.